တောင်ငူသား

..... စိမ်းလန်းပါစေ ကမ္ဘာမြေ ... ငြိမ်းချမ်းပါစေ ကမ္ဘာမြေ .....

Thursday, July 17, 2008

ဝါဆိုပန်းခူး

ဝါဆိုလပြည့်နေ့မှာ ဥပုသ်သီတင်းဆောက်တည်ကြ ကုသိုလ်ကောင်းမှုတွေလုပ်ပြီးကြလို့ နောက်တစ်နေ့မှာတော့ ဝါဆိုပန်းခူးထွက်ကြလေ့ရှိတယ်။ ဝါဆိုပန်းဆိုတာ မိုးတွင်း ဝါဆိုချိန်ဆို အလေ့ကျပေါက်တဲ့ ပန်းလေးတွေပါ။ မြို့ထဲမှာလည်း ပေါက်ပေမယ့် တောထဲတောင်ထဲမှာ တပျော်တပါး ပန်းခူးထွက်ကြပြီး ဘုရားကပ်လှူကြတာပါ။ ဝါဆိုပန်းအကြောင်းကိုတော့ အသေးစိပ်မသိပါဘူး။ ကျွန်တော်မှတ်မိသလောက်တော့ ရိုးတံအစိမ်း၊ အရွက်စိမ်းနဲ့ အပွင့်က အဝါရောင်အခိုင်အဖူးလေးဖြစ်ပါတယ်။ အနီးစပ်ဆုံးပြောရရင် ပန်းထိမ်ငိုပန်းနဲ့ ဆင်ပါတယ်။

ကျွန်တော်ကလေးဘဝတုန်းကတော့ တောထဲမှာ ဝါဆိုပန်းခူးဖူးတဲ့ အတွေ့အကြုံလေးတွေ ရှိခဲ့ဖူးပါတယ်။ တောင်ငူမှာ အမေဖက်က အဘွားတွေ အမျိုးတွေ အိမ်နီးချင်းတွေနဲ့ ဝါဆိုလပြည့်ကျော်တစ်ရက်နေ့တိုင်း မြတ်စောညီနောင်ဘုရားသွားတဲ့ လမ်းမှာရှိတဲ့ ဘုရားနဲ့ဘုန်းကြီးကျောင်းတစ်ကျောင်းကို ဝါဆိုပန်းခူးရင်း သွားလေ့ရှိကြပါတယ်။ မြကျိုင်းတောင်ဘုရားလို့ထင်ပါတယ်။

မနက်စောစောကတည်းက ချက်ပြုတ် ပြင်ဆင်ထားကြပြီး စစ်တောင်းတံတားထိပ်ထိ လမ်းလျှောက်သွားကြပါတယ်။ အဲဒီမှာ မြင်းလှည်းဂိတ် ရှိတယ်လေ။ မြင်းလှည်းနှစ်စီး သုံးစီးငှားပြီး မြတ်စောညီနောင်ဘုရားနဲ့ ပသိချောင်း-သံတောင်(၁၃ မိုင်) သွားတဲ့ လမ်းခွဲဖြစ်တဲ့ လေးမိုင်လမ်းဆုံထိ မြင်းလှည်းစီးကြပါတယ်။ လမ်းဆုံကနေ ပသိချောင်းဖက်သွားတဲ့လမ်းပေါ်က လေသာတောင်ပေါ်တက်ပြီး ဘုရားဖူးကြပါတယ်။ အဲဒီကနေ ပြန်ဆင်းလာပြီး လမ်းတစ်ဖက်ခြမ်းကိုတော့ ကပ်ကျော်ကုန်းလို့ခေါ်တယ်။ တောင်ကုန်းလေးပေါ် တက်လိုက်ရင် ကပ်ကျော်စေတီလေး တစ်ဆူကို ဖူးမြင်ရပါတယ်။ ခပ်အုပ်အုပ်တောတန်းလေးထဲက ဆည်းလည်းသံ တရွှင်ရွှင်နဲ့ စေတီလေးကို ဖူးရတာ အင်မတန် အေးချမ်းလှပါတယ်။ စေတီလေးနားမှာ တစ်ပါးတည်း သီတင်းသုံးတဲ့ ဘုန်းကြီးကျောင်းလေး တစ်ကျောင်းလည်းရှိပါတယ်။ ဆရာတော်ကို ဝတ်ပြု၊ လှူဖွယ်တွေလှူပြီး တောလမ်းလေးအတိုင်း ဆက်သွားကြပါတယ်။ အဲဒီတောတန်း တစ်လျှောက်လုံးမှာတော့ ဝါဆိုပန်းဝါဝါတွေ ဟိုတစ်ပင်ဒီတစ်ပင် အလေ့ကျ ပေါက်နေကြတာ အများကြီးပါပဲ။ ပန်းတွေကို အလုအယက်ခူးကြတာ ပျော်စရာကောင်းလှပါတယ်။

တောတန်းလေးရဲ့ တစ်နေရာမှာတော့ သဘာဝအတိုင်းဖြစ်နေတဲ့ ဂူတစ်ဂူရှိတယ်။ အတွင်းမှာ မှောင်နေပြီး စမ်းရေတွေ တစ်စက်စက်စီးထွက်နေတယ်။ ပန်းတွေ အပြိုင်အဆိုင်ချိုးကြရင်း ရှေ့ဆုံးရောက်နေတဲ့ ကျွန်တော်တို့ ကလေးတွေ အဲဒီဂူကြီးနားရောက်ရင် အလိုလိုတံ့သွားကြပြီး လူကြီးတွေအလာကို စောင့်ကြပါတယ်။ သတ္တိကောင်းတာပါ။ တစ်ဖွဲ့လုံးမှာ ကလေးတွေက ကျွန်တော်အပါအဝင် နှစ်ယောက်လား သုံးယောက်လားပါပါတယ်။ ယောက်ျားသားဆိုလို့ ကျွန်တော်ရယ် ကျွန်တော့်ညီဝမ်းကွဲရယ် နှစ်ယောက်ကြီးများတောင်ပါ။ တောလမ်းလေးတစ်လျှောက် သွားကြရင်း ဟိုးဖက်ထိပ်ရောက်တော့မှ ကားလမ်းမပေါ်ပြန်ရောက်ကြပါတယ်။ အဲဒီကနေ လမ်းဆက်လျှောက်ကြပြီး မြတ်စောညီနောင်ဘုရားသွားတဲ့ လမ်းပေါ်က မြကျိုင်းတောင်ဘုရားနဲ့ ဘုန်းကြီးကျောင်းဆီကို ရောက်ပါတော့တယ်။

ဘုရားနဲ့ ဘုန်းကြီးကျောင်းမှာရှိတဲ့ ပန်းအိုးတွေအကုန် ဝါဆိုပန်းတွေနဲ့ ဝေဆာနေအောင် လဲလှယ် ကပ်လှူကြပါတယ်။ ဆရာတော်ကို အသင့်ယူလာတဲ့ သင်္ကန်းနဲ့ လှူဖွယ်တွေလှူ၊ သီလယူ၊ ဥပုသ်စောင့်ကြပြီး ဆွမ်းကပ်ကြပါတယ်။ ဆရာတော်ဘုန်းပေးပြီတော့မှ မွန်းမတည့်မီ နေ့လည်စာကို အားလုံးဝိုင်းဖွဲ့စားကြတာပေါ့။ သူ့အိမ်ကိုယ့်အိမ်က ဟင်းတွေအစုံအလင်နဲ့ အင်မတန်စားကောင်းလှပါတယ်။ နေ့လည်ခင်းမှာတော့ လူကြီးတွေက ဘုရားထဲသွားပြီး တရားထိုင် ဘုရားရှိခိုးနေကြချိန်မှာ ကလေးတွေကတော့ ကျယ်ဝန်းပြန့်ပြူးလှတဲ့ ဘုရားပရဝုဏ်ထဲမှာ ပြေးလွှားဆော့ကစားရတာ မောရပန်းရမှန်းတောင် သတိမရကြပါဘူး။ ညနေ နေအေးတော့မှ ဘုရားကန်တော့ ဆရာတော်ကို ဦးချပြီး အားလုံးပြန်ခဲ့ကြပါတော့တယ်။ အခုတော့ အဘွားတွေလည်း အသက်တွေ အတော်လေးရလာကြပြီမို့ မသွားနိုင်ကြတော့ဘူးထင်ပါတယ်။ အိမ်ကိုဖုံးဆက်တော့မှ မေးကြည့်ရဦးမယ်။

4 comments:

ဝါဆိုပန်းဆိုတဲ့ နာမည်နဲ့ ပန်းက သီးသန့်ရှိတယ်လား။
ဒီမှာလည်း ၀ါဆိုပန်းခူးထွက်တဲ့အကြောင်း ရေးထားတာရှိတယ်။
ဖတ်ကြည့်ပါဦး။

http://o-way.blogspot.com/2008/06/blog-post_26.html
 
ဝါဆိုပန်းခူးတခါမှ မထွက်ဖူးဘူး။ ကျမအမေတို့ ခေတ်တုန်းကတော့ ရှိတယ်တဲ့။ ခုတော့ တိမ်ကောကုန်ပြီ။
 
ဝါဆိုပန်းဆိုတာ သပ်သပ်ရှိသလား မောင်လေးရေ။ အမလည်း မကြားဖူးလို့ မေးကြည့်တာ။ အမတို့ အဲဒီအတွေ့အကြုံမရှိဘူး။ ပန်းတွေဝယ်ပြီး ဘုန်းကြီးကျောင်းသွားလှူတယ်။ ဘုရားသွားတယ်ပဲ ရှိတာ။ တခါမှ မထွက်ဖူးဘူးတော့။ အခုမှ သိတော့တယ်။ ပျော်စရာကောင်းမယ်ထင်တယ်နော်။
 
အမဇနိရေ ဝါဆိုပန်းဆိုတာ ကျွန်တော်တို့မြို့မှာတော့ အဲဒီပန်းကိုပဲခေါ်ပါတယ်
သေချာအောင် ကျွန်တော်ထပ်မေးပြီးပါပြီ
အခြားဒေသတွေနဲ့ ကွဲလွဲနိုင်ပါတယ်
 

Popular Posts