တောင်ငူသား

..... စိမ်းလန်းပါစေ ကမ္ဘာမြေ ... ငြိမ်းချမ်းပါစေ ကမ္ဘာမြေ .....

Saturday, March 15, 2008

တောင်ငူ နှစ်ကျိပ်ရှစ်ဆူပွဲ

တောင်ငူ နှစ်ကျိပ်ရှစ်ဆူပွဲတော်ဟာ ယခုနှစ်တွေမှာ ပျဉ်းမနားနှစ်ကျိပ်ရှစ်ဆူပွဲလောက် မစည်ကားတော့ပေမယ့် နှစ်စဉ်မပျက်မကွက် ကျင်းပပူဇော်မြဲပါ။ တောင်ငူမှာ ရွှေဆံတော်ဘုရား၊ မြစည်းခုံဘုရား၊ ကောင်းမှုတော်ဘုရား၊ နဂါးရုံဘုရား၊ ကေလဇာတီဘုရား နှင့် မြတ်စောညီနောင်ဘုရားများ စသော ထင်ရှားတဲ့ ဘုရားများစွာတည်ထားကိုးကွယ်ကြပါတယ်။ ယခုနှစ်ကျိပ်ရှစ်ဆူပွဲတော်ဟာ ကေလဇာတီဘုရားမှာ ကိန်းဝပ်စံပယ်တော်မူသည့် နှစ်ကျိပ်ရှစ်ဆူကုန်သော မြတ်စွာဘုရားများ မြို့တွင်းသို့ ဒေသစာရီကြွချီရာမှာ တောင်ငူမြို့ပေါ်သာမက အနီးနား မြို့ရွာများမှပါမကျန် လာရာက်ဖူးမြှော်ကြလို့ အင်မတန်စည်ကားလှပါတယ်။ နှစ်စဉ်လှည့်လည်အပူဇော်ခံရာမှာ နေ့ခင်းပိုင်းဒေသစာရီကြွချီ်ပွဲကို တန်ဆောင်မုန်းလဆန်း(၁၃)ရက် ညနေပိုင်းမှာတစ်ကြိမ်၊ အာရုဏ်ဆွမ်းလောင်းလှူပွဲကို တန်ဆောင်မုန်းလပြည့်နံနက်အာရုဏ်တက်မှာတစ်ကြိမ် ကျင်းပလေ့ရှိပါတယ်။


နေ့ခင်းပွဲမှာ ရပ်ကွက်များ၊ အစိုးရဋ္ဌာနများ၊ ဘာသာရေး လူမှုရေးအသင်းဖွဲ့များနှင့် လုပ်ငန်းရှင်များမှ ဘုရားတစ်ဆူကျစီကို ပူဇော်ပွဲမတိုင်ခင် ရက်ပိုင်းအလိုကပင် ယာယီစံကျောင်းများသို့ ပင့်ဆောင်ကြပါတယ်။ လှည့်လည်ရာတွင် ဘုရားများပင့်ဆောင်မည့်ကားများကို ပန်းချီဆေးရေးများ၊ မီးပန်းဆိုင်းများ၊ မြန်မာ့ရိုးရာ အနုပညာလက်ရာများဖြင့် သပ္ပါယ်ကြည်ညိုဖွယ်ဖြစ်အောင် အထူးထူး စီမံပူဇော်ကြပါတယ်။ လဆန်း(၁၃)ရက် ညနေချမ်းမှာတော့ နှစ်စဉ် ဗဟိုမဏ္ဍပ်တည်ရှိရာ လမ်းမကျယ်ထောင့်တွင် အခမ်းအနားဖြင့် စတင်ဖွင့်လှစ်ပြီး လမ်းမကျယ်လမ်း၊ ဗိုလ်မှူးဖိုးကွန်းလမ်းတို့မှ စတင်ကာ မြို့တွင်းသို့ ဒေသစာရီကြွချီပါတယ်။ ဗဟိုမဏပ်မှ ဘုရားများ ပူဇော်ရာတွင် ထူးခြားဆန်းကြယ်စွာ တန်ဆာဆင်နိုင်သော အဖွဲ့များအား ဗဟိုမဏ္ဍပ်မှ ဆုများချီးမြှင့်ပါတယ်။


ရွှေနှင်းဆီဆေးလိပ်ခုံ၊ ပညာရေးကောလိပ်ကျောင်းတို့ကတော့ ရှေ့ဆုံးဘုရားအမှတ် (၁)နှင့်(၂)တို့ကို မင်္ဂလာစည်တော်များဖြင့်လည်းကောင်း၊ ဒေဝါဝင်း ရာဇာဝင်း(မင်းခမ်းမင်းနား)ခင်း၍လည်းကောင်း ပင့်ဆောင်မြဲပါ။ အဲဒီနောက်မှာတော့ မြို့မဈေးကြီးမိသားစု၊ ဘုရင့်နောင်ဈေးမိသားစုနှင့် ရပ်ကွက်များမှ မင်းသားအက၊ ဦးရွှေရိုးအက၊ ကျွဲနှစ်ကောင်အက၊ လူရိုင်းအကအစရှိသောမြေဝိုင်းအကမျိုးစုံ၊ တရုတ်အမျိ်ုးသားများရဲ့ ခြင်္သေ့ နဂါးအက၊ ဟိန္ဒူအဖွဲ့၊ ချစ်တီးယားအဖွဲ့ အစရှိသော ဘာသာရေး လူမှုရေးအသင်းအဖွဲ့အသီးသီးတို့မှ အတီးအမှုတ်အကအခုန်များဖြင့် လှည့်လည်ပင့်ဆောင်ကြပါတယ်။


သစ်ထုတ်၊ ဆောက်လုပ်ရေး၊ ရပ်ကွက်(၁၆)၊ ရပ်ကွက် (၁၇)နှင့် ကြယ်နီဆေးပေါ့လိပ် အဖွဲ့များကတော့ အမှတ်စဉ်နောက်ပိုင်းမှ ဘုရားများအားပင့်ဆောင်ပူဇော်ကာ ရန်ကုန်မှ နာမည်ကြီးတီးဝိုင်းနှင့် နာမည်ကြီးတေးသံရှင်များ၊ မြို့ခံတီးဝိုင်းများနှင့်တေးသံရှင်များ၊ မြန်မာသံတီးဝိုင်းများဖြင့် ညဦးပိုင်းမှ စတင်ကာ နောက်တစ်နေ့နံနက်ထိ ညလုံးပေါက် သီဆိုဖျော်ဖြေကြပါတယ်။ နှစ်သက်ရာ တီးဝိုင်းနောက်ကို လိုက်ပါအားပေးကြတဲ့ ပရိတ်သတ်တွေဟာ တစ်မြို့လုံးအနှံ့ စည်ကားလှပါတယ်။ ညလုံးပေါက် လိုက်ကြည့်တဲ့ပရိတ်သတ်တွေ အတွက်ဗိုက်ဆာရင် မပူရပါဘူး။ အကြော်စုံ၊ ကောက်ညှင်းပေါင်း၊ ကောက်ညှင်းကျည်တောက် (ခဲတံဝါး)၊ တောင်ငူမုန့်ဟင်းခါးဟင်းရည်ကျဲ၊ ရန်ကုန်မုန့်ဟင်းခါး၊ လက်ဖက်ရည်ဆိုင်တွေ စသည်ဖြင့် ဒီတစ်ရက်စာအတွက် မနက်ကတည်းက နေရာတွေဦးပြီး တစ်ညလုံးရောင်းတဲ့ ဆိုင်တွေက အမယ်စုံလှပါတယ်။


ကျွန်တော်တို့ငယ်တုန်းကတော့ အိမ်ရှေ့ကားဖြတ်တဲ့အချိန် လူကြီးတွေနှိုးမှ အိပ်ယာက လူးလဲထကြည့်ရပါတယ်။ မနက်စောစော တီးဝိုင်းတွေ ပြန်မသိမ်းခင်ကိုလည်း အဖေက လိုက်ပြပါသေးတယ်။ အရွယ်လေးရောက်လာတော့ ကိုယ်နားထောင်ချင်တဲ့ အဆိုတော်ပါတဲ့ကား အိမ်နားလာရင် လိုက်နားထောင်တယ်။ ဗိုက်ဆာရင် မုန့်ထွက်စားတယ်။ အိမ်နဲ့ နည်းနည်းလှမ်းသွားရင်တော့ ဆက်မလိုက်တော့ပဲ အိမ်ပြန်ပြီး အိမ်ပေါ်ထပ်ရှေ့က ပြတင်းပေါက်တွေကိုဖွင့် ဖျာလေးခင်း၊ ခေါင်းအုံးလေးချ၊ ရေနွေးအိုးလေး ဘေးမှာအဆင်သင့်ထားပြီး အင်မတန် ဇိမ်ကျတာပေါ့။ အိမ်နဲ့နီးတော့ ဗဟိုမဏ္ဍပ်ဖက်က အသံတွေကိုလည်း တစ်စွန်းတစ်စ ကြားရသေးတယ်။ ဆောင်းလေလေးကအေးအေး အိပ်တဝက် နိုးတဝက်နဲ့ လမ်းပေါ်ကလူတွေက ဗဟိုမဏ္ဍပ် (အဆိုတော် ဦးမောင်မောင်လွင်(ခ) ရင်ဂို၊ ကျားပေါက် (ခ) ဟန်ထူးလွင် တို့ရဲ့ အိမ်ရှေ့နား၊ ငြိမ်းချမ်းရေးစာပေရှေ့)ကို ဘယ်ကားသွားနေပြီဟေ့ဆို ပြေးကြည့်လိုက်၊ ပြီး တရေးပြန်အိပ်လိုက်နဲ့ပဲ မိုးလင်းသွားပါတော့တယ်။ အဲဒီနေ့ တစ်နေကုန်တော့ အိပ်ရေးဝအောင်အိပ်ပြီး အားမွေးထားပေဦးတော့။ ညကျရင် အရုဏ်ဆွမ်းခံလိုက်ရဦးမယ်လေ။ နှစ်စဉ် တန်ဆောင်မုန်းလဆန်း(၁၃)ရက် ညတိုင်း ကျွန်တော်တို့ တောင်ငူမြို့လေးဟာ ဆောင်းဂီတညလေးတစ်ညကို ပိုင်ဆိုင်မြဲပါ။


တစ်နေကုန် အိပ်ရေးဝထားတာမို့ ကျွန်တော်တို့ လန်းဆန်းတက်ကြွနေကြပါတယ်။ ညနေစောင်းတော့ ကံရိုးရွာဖက် ပန်းဝယ်ထွက်ကြပါတယ်။ ပြန်ရောက်တော့ လိုအပ်မယ့် ပစ္စည်းတွေ ပြင်ဆင်ရပါတယ်။ ကြေးစည်ကိုတော့ ဘုန်းဘုန်းကျောင်းဆီပြေးငှား၊ အလှူခံဖို့ ငွေဖလားကတော့ ဟိုအိမ်တစ်လုံးဆွဲ ဒီအိမ်တစ်လုံးဆွဲပေါ့။ သပိတ်ရယ် ဆန်တောင်းရယ်ကတော့ ဂေါပကအဖွဲ့ကပေးပါရဲ့။ သစ်သီးဗန်းကတော့ အားလုံးရလေ့မရှိပါဘူး။

ညဦးပိုင်း လက်ဖက်ရည်ဆိုင်မှာသူငယ်ချင်းတွေစု၊ လူစုံ ပစ္စည်းစုံတော့ ကေလဇာတီဘုရားဆီသို့ ချီတက်ကြပါတယ်။ အနီးဆုံး သူငယ်ချင်းတစ်ယောက်အိမ်မှာ ဖိနပ်တွေထားခဲ့ကြတယ်။ ဘုရားရောက်တော့ တိုးမပေါက်အောင် လူတွေ ပြည့်ကျပ်နေပါပြီ။ ဘုရားမရသေးတဲ့အဖွဲ့တွေကတော့ ဟိုပြေးဒီပြေးပေါ့။ ကျွန်တော်တို့အဖွဲ့က ဒီနှစ်တော့ ကံကောင်းပါရဲ့။ ရှေ့ပိုင်းဘုရား ရတယ်လေ။ နေ့ခင်းပိုင်း ဘုရားပင့်တဲ့ အဖွဲ့တွေဆီမှ တာဝန်ခံလူကြီးတစ်ယောက်က တောင်းပေးမှ ဘုရားပင့်ဆောင်ခွင့် တုံကင် ရပါတယ်။ အခန့်မသင့်ရင် လူငယ်အဖွဲ့တွေ လုကြရပါသေးတယ်။ နှစ်ကျိပ်ရှစ်ဆူကုန်သော ဘုရားများကို ကျောင်းဆောင်ငယ်များဖြင့် ပုခုံးထက်မှာ ထမ်းပြီး ကြွချီပင့်ဆောင်ရတာပါ။ ဘုရားကျောင်းဆောင်ကို အဆင်သင့်ယူဆောင်လာတဲ့ ပန်းများဖြင့် တင့်တယ်သပ္ပါယ်အောင် တန်ဆာဆင်ကြပါတယ်။ ကျောင်းဆောင်ရဲ့ ရှေ့ပိုင်းမှာ အမွှေးတိုင်ပူဇော်နိုင်ကြရန် ငှက်ပျောတုံးငယ် နှစ်တုံးနဲ့ ဖယောင်းတိုင်မီးများ ထွန်းညှိပူဇော်နိုင်ကြရန် နေရာများရှိပါတယ်။

မကြာခင် တန်ဆောင်မုန်းလပြည့် နံနက်သို့ ရောက်ရှိသည်နှင့် ဂေါပကအဖွဲ့ယာဉ်မှ ကြိုတင်နှိုးဆော်ပါတော့တယ်။ ရှေ့ဆုံးမှ ဗျာဒိတ်ပေး ရပ်တော်မူ ရုပ်ပွါးတော်ကြီးအား ပင့်ဆောင်ပါတယ်။ အဲဒီနောက်မှာမှ နှစ်ကျိပ်ရှစ်ဆူကုန်သောဘုရားရှင်တို့ အစဉ်အတိုင်း အပူဇော်ခံကြွချီပါတယ်။ ဘုရားတစ်ဆူပင့်ဆောင်သော အဖွဲ့တိုင်းမှာ ရှေ့ဆုံးမှ အမျိုးသားတစ်ဦးက ဆွမ်းတော်သပိတ်ကို ပွေ့ပိုက်ကိုင်ဆောင်ရပါတယ်။ နောက်မှာတော့ ဆွမ်းဆန်စိမ်းတောင်း၊ သစ်သီးဗန်းနှင့် ကြေးစည်တို့ကို ရှေ့နောက်တစ်ယောက်စီ ထမ်းကြပါတယ်။ အဲဒီနောက်တွင်တော့ ဘုရားကျောင်းဆောင်ကို ယောကျာင်္းလေးဆို နှစ်ဦး၊ မိန်းကလေးဆို လေးဦး ပုခုံးထက်မှာ အလှည့်ကျထမ်းပြီး ပင့်ဆောင်ကြပါတယ်။ နောက်ဆုံးမှာမှ ကိုယ့်အဖွဲ့အလိုက် တန်းစီပြီး ဆုတောင်းမေတ္တာပို့သခြင်း၊ ပရိတ်တော်များရွတ်ဖတ်ခြင်းဖြင့် လိုက်ပါကြပါတယ်။


ဘုရားများကြွချီရာ လမ်းတလျှောက်မှာတော့ ကြိုတင်နှိုးဆော်ထားတာမို့ အိမ်တိုင်းအိမ်တိုင်းမှ မိမိတို့အိမ်ရှေ့တွင် စားပွဲကြီးငယ်များဖြင့် သစ်သီးမျိုးစုံ၊ မုန့်မျိုးစုံ၊ သကြားလုံးများ၊ ဖယောင်းတိုင်များ၊ အမွှေးတိုင်များ၊ ဆွမ်းဆန်များ အစရှိတဲ့ လှူဖွယ်ဝတ္ထုအစုစုတို့ကို အသင့်ခင်းကျင်းပြီးဖြစ်နေပါပြီ။ အာရုဏ်ဆွမ်းခံထွက်လိုက်ပါကြသော ကုသိုလ်ရှင်လူငယ်မောင်မယ်အပေါင်းတို့အား အကျွေးအမွေးဖြင့် ဧည့်ခံကြသော အလှူရှင်များမှာပေါများလှပါတယ်။ ကြာဆံဟင်းခါး၊ မုန့်ဟင်းခါး၊ ရခိုင်မုန့်တီ၊ ပဲသုပ်၊ တို့ဟူးသုပ်၊ ဆေးပေါင်းခတဲ့ မယ်ဇလီဖူးသုပ်၊ ကော်ဖီ၊ လက်ဖက်ရည်၊ မုန့်မျိုးစုံ၊ ကောက်ညှင်းပေါင်း၊ ပလာတာ၊ စမူဆာ အစရှိသဖြင့် အမယ်စုံလင်လှပါတယ်။ လမ်းတလျှောက်မှာ လှူတန်းကြသူများအား ဆုတောင်းမေတ္တာပို့သရာမှာ ဋ္ဌာန်ကရိုဏ်းကျကျ ရွတ်အော်ပေးနိုင်သူပါဝင်တဲ့ အဖွဲ့ကတော့ အဆင်ပြေလှပါတယ်။ ကျွန်တော်တို့အဖွဲ့ကတော့ အများစုဆုပေးလေ့ရှိတဲ့ “ယခုပြုရ ကုသလကြောင့် ဇောတိက၊ ဇဋိလ၊ .... ၊..... အစရှိသော သူဋ္ဌေးကြီးလေးဦးကဲ့သို့ ပေး၍မကုန် လှူ၍မခမ်း ပဒုမ္မာရွှေကြာပန်းကဲ့သို့ ပွင့်လန်းတော်မူနိုင်ကြပါစေခင်ဗျား” ဆိုတဲ့ဆုတောင်းစာကိုသာ တွင်တွင်ရွတ်ဆိုရပါတယ်။


ညသန်းခေါင်ထဲက မနက်ရှင်းရှင်းလင်းသည်အထိ တစ်မြို့လုံးအနှံ့ ပင့်ဆောင်ရတာမို့ ကလေးတွေ ဆာကြမယ်ဆိုတာ အားလုံးသိပြီးသားပါ။ ဒါပေမယ့် အကျွေးအမွေးတွေက များလွန်းတဲ့နှစ်ဆိုရင်တော့ သပိတ်တွေ၊ တောင်းတွေ၊ ကျောင်းဆောင်တွေပေါ်မှာ မုန့်တွေလျှံနေလေ့ရှိပါတယ်။ဂေါပကအဖွဲ့တွေက လှူဖွယ်တွေ ဘယ်လိုပင်လိုက်လံသိမ်းဆည်းပေးသော်ငြား ထက်သန်လှတဲ့ သဒ္ဓါတရားကြောင့် အင်မတန်များပြားတဲ့ ဖယောင်းတိုင်၊ အမွှေးတိုင် နဲ့ လှူဖွယ်တွေဟာ မကုန်နိုင်ပါဘူး။ ဘုရားများကြွချီခဲ့ရာ လမ်းတစ်လျှောက်မှာတော့ ကျောင်းဆောင်များမှာ ထွန်းညှိပူဇော်ခဲ့ကြတဲ့ ဖယောင်းတိုင်၊ အမွှေးတိုင်များကို လမ်းဘေးဝဲယာများမှာ ချထွန်းခဲ့ကြတာဖြင့် တကယ့်ကို မွှေးကြိုင်လင်းကျင်းနေပါတော့တယ်။ နောက်ဆုံးမှာတော့ ရေကင်းသံတညံညံဖြင့် ဆိုင်းဝိုင်းမှ တီးမှုတ်လိုက်ပါပါတယ်။ ကောင်းကင်က တန်ဆောင်မုန်းလပြည့် လမင်းကြီးရဲ့ အလင်းရောင်တွေနဲ့အတူ မြို့သူမြို့သားတွေရဲ့ ထက်သန်တဲ့ သဒ္ဓါတရားတွေဟာ ကျွန်တော်တို့ တောင်ငူမြို့လေးကို ရစ်သိုင်းလွှမ်းခြုံထားပါတော့တယ်။

ကျွန်တော်တို့ တောင်ငူသူ၊ တောင်ငူသားတွေဟာ ဘယ်နေရာ၊ ဘယ်ဒေသတွေ ရောက်နေပါစေ နှစ်စဉ် တန်ဆောင်မုန်းလပြည့်နီးလာရင် ပြန်နိုင်တဲ့သူတွေက ဒီပွဲကို မရောက်ရောက်အောင်ပြန်ကြပါတယ်။ ကျောင်းတုန်းကတော့ တစ်ခြားမြို့က သူငယ်ချင်းတွေကိုပါ ဒီပွဲလေးကို အပါခေါ်ပါတယ်။ ဒီအချိန်ဆို သံတောင်-ပသိချောင်း အပန်းဖြေစခန်း ကလည်း အတော်ကို သွားလာလို့ ခြေခင်းလက်ခင်းသာနေပါပြီ။

Tuesday, March 11, 2008

စွယ်တော်နန်းရဲ့ မော်ကွန်း


၁၉၂၄
ရန်ကုန်တက္ကသိုလ်၏ ဋ္ဌာနခွဲတစ်ခုအဖြစ် စတင်ဖွင့်လှစ်
၁၉၂၇
ဘီအိုစီသတ္တုတူးဖော်ရေးနှင့် အင်ဂျင်နီယာကောလိပ်အတွင်းသို့ ပြောင်းရွှေ့ဖွင့်လှစ်
၁၉၄၆
ရန်ကုန်တက္ကသိုလ်၏ အင်ဂျင်နီယာမဟာဋ္ဌာနအဖြစ် အဆင့်မြှင့်ဖွင့်လှစ်
၁၉၆၁
ဗမာ့စက်မှုတက္ကသိုလ် (BIT) အဖြစ်သို့ တိုးမြှင့် (ကြို့ကုန်း၊ အင်းစ်ိန် ကျောင်းဝင်းနေရာတွင် စတင်ဖွင့်လှစ်)
၁၉၆၄
ရန်ကုန်စက်မှုတက္ကသိုလ် (RIT) အဖြစ် အမည်ပြောင်းလဲ
(RUလက်အောက်မှ ခွဲထွက်ကာ ဘွဲ့ဒီဂရီအပ်နှင်းသော သီးခြားတက္ကသိုလ်အဖြစ်ရပ်တည်)
၁၉၉၀
ရန်ကုန်စက်မှုတက္ကသိုလ် (Rangoon Institute of Technology, RIT) မှ
ရန်ကုန်စက်မှုတက္ကသိုလ် (Yangon Institute of Technology, YIT) အမည်သို့ပြောင်းလဲ
၁၉၉၁
မန္တလေးစက်မှုတက္ကသိုလ် (Mandalay Institute of Technology, MIT) ကိုစတင်ဖွင့်လှစ်
၁၉၉၇
ပြည်စက်မှုတက္ကသိုလ် (Pyay Institute of Technology, PIT) ကိုစတင်ဖွင့်လှစ်
၁၉၉၈
ပညာရေးဝန်ကြီးဋ္ဌာနအောက်မှ သိပ္ပံနှင့်နည်းပညာဝန်ကြီးဋ္ဌာနအောက်သို့ ပြောင်းရွှေ့ပြီး
ရန်ကုန်နည်းပညာတက္ကသိုလ် (Yangon Technological University, YTU)၊
မန္တလေးနည်းပညာတက္ကသိုလ် (Mandalay Technological University, MTU) နှင့်
ပြည်နည်းပညာတက္ကသိုလ် (Pyay Technological University, PTU)
အမည်များသို့ အသီးသီးပြောင်းလဲခေါ်ဝေါ်

မှတ်ချက်။ ။

အထက်တန်း(၁၉၉၅)အောင် Batch များမှာ ပထမနှစ်ကို YIT နှင့် MITတွင်လည်းကောင်း၊ ဒုတိယနှစ်ကို မိမိတို့ဒေသတွင်းရှိ စက်မှုလက်မှုသိပ္ပံ (GTI) ကျောင်းများတွင် လည်းကောင်း တက်ရောက်ရပြီး တတိယနှစ်မှနောက်ဆုံးနှစ်ထိကို YTU, MTU, PTU တို့တွင် ဆက်လက်တက်ရောက်။

အထက်တန်း(၁၉၉၆၊ ၉၇၊ ၉၈)အောင် Batch များမှာ ပထမနှစ်နှင့် ဒုတိယနှစ် နှစ်နှစ်ကို မိမိတို့ဒေသတွင်းရှိ စက်မှုလက်မှုသိပ္ပံ (GTI) ကျောင်းများတွင် တက်ရောက်ရပြီး တတိယနှစ်မှနောက်ဆုံးနှစ်ထိကို YTU, MTU, PTU တို့တွင် ဆက်လက်တက်ရောက်။


ref: ဆရာပူဇော်ပွဲ (ရန်ကုန်၊ ၂၀၀၄) အမှတ်တရစာအုပ်ငယ်
http://www.rit-alumni.info/
http://en.wikipedia.org/wiki/Yangon_Technological_University

Popular Posts